How I Started My Journey
القصة بدأت ازاي ؟
البداية كانت وانا في سادسة ابتدائي كان اول مرة افكر فيها ازاي البرامج والمواقع ده اتعملت ومين الي عملها وازاي اتعملت اصلا ومكنتش لسة عارف في وقتها هي ايه البرمجة اصلا ومع الوقت نسيت الموضوع علشان موصلتش لاجابة لسؤالي.
ولما دخلت اولة اعدادي كان عندنا في منهج الحاسب الالي برنامج اسمه Scratch والبرنامج ده ببساطة معمول علشان يوصل مفهوم البرمجة للأطفال بطريقة بسيطة عن طريقة انك تعمل العاب منغير كتابة كود لا ببلوكات بتتوصل مع بعض.
بس اهتميت وقتها بمذاكرة باقي المواد فمجربتش بايدي اني اطبق في scratch.
اول ماخذت الاجازة علي طول قعدت احاول فيه كتير بس مكنتش فاهم في حاجة و معرفتش اعمل بيه أي لعبة وهنا كان اول مرة افكر اني اعمل سيرش فدخلت علي اليوتيوب ودورت علي شرح للبرنامج علشان اتعلم استخدمه وفعلا بدأت اتعلم حاجة حاجة فيه واطبق عليها ومع الوقت بقيت عارف كل حاجة فيه تقريبا وعملت فعلا لعب بيه كبيرة ووقتها حسيت اني عملت انجاز كبير اوي.
أول سؤال غير كل حاجة
مع الوقت ادركت ان اكيد البرمجة مش سهلة كده وحتي لو البرنامج ده بيعمل العاب, طب ازاي ممكن اعمل برامج او مواقع او او
وهنا بقي جربت اعمل سيرش بنفسي علي يوتيوب وكتبت "ازاي اتعلم برمجة".
أول كورس... وأول غلطة
اول نتيجة طلعتلي كانت بلاي ليست لواحد عراقي وكان عبارة عن ثلاث فيديوهات
طبعا فرحت جدا و بدأت اتفرج ونزلت البرنامج الي قال عليه والي كان اسمه Sublime Text وبدأت اطبق وراه خطوة خطوة
بس المشكلة ان كانت طريقة شرحه غلط جدا (وانا مكنتش عارف كده فوقتها)
مكنش بيشرح اساسيات ولا حتي كان قال اسم المجال الي بيشرحه ايه
هو دخل فتح البرنامج وبدأ يكتب كود ويعمل الموقع وانا بكتب وراه وخلاص
فالمهم لما خلصت الثلاث فيديوهات دول بدأت اعمل موقع ليا بنفسي وكنت فرحان اوي اني بعمل حاجة لوحدي
أول صدمة
بعد مخلصت الموقع وجيت بقي ابعته لصحابي يشوفوه فعملت زي مبعمل مع اي موقع اخد اللينك كوبي وابعته بس الي حصل ان الموقع مفتحش مع حد وكنت مستغرب اشمعنا شغال عندي ومش شغال مع حد تاني
وكان السبب علشان اللينك كان بيبدأ ب
file:///
وانا مكنتش عارف وقتها يعني ايه file protocol ولا اني المفروض ارفعه علي hosting الاول قبل مابعته لحد
فبسبب ده اضايقت جدا وزعلت وسيبت المجال لفترة طويلة
كنت فاكر المدرسة هتحل المشكلة
في ثانية اعدادي بقي كان منهج الحاسب الالي بيتكلم عن HTML ففرحت بقي علشان هيشرحوا كل حاجة واكيد هعرف احل المشكلة الي كانت عندي
فالمهم جيت بسمع حصة ورا حصة ومكانوش بيشرحوا اي حاجة جديدة خالص كل الحاجات الي كانوا بيشرحوها كانت سطحية جدا بدرجة ان كل الحاجات الي هم شرحهوها كانت موجودة في الثلاث فيديوهات الي كنت شفتهم, حتي لما كنت بروح اسألهم عن كود معين في اللغة زي
<!DOCTYPE html>
( وده الي بيعرف البراوزير ان الكود كله مكتوب باصدار HTML5 ) مكانوش عارفين
ومكانوش بيقولوا مش عارفين كانوا بيقولوا اي حاجة وخلاص مع ان ده كود اساسي مينفعش حد يبدأ منغيره اصلا, وبرده لما سألتهم ليه مش عارف ابعت لحد اللينك برده معرفوش
فزعلت تاني وسبت المجال لفترة طويلة تاني.
النصيحة اللي غيرت كل حاجة
في آخر تانية إعدادي وانا بفر في الفيس مرة لقيت نصيحة من واحد بيقول
"لو عايز تبدأ أي مجال... ادخل جروبات الناس المهتمة بالمجال ده."
فختر علي بالي وقتها اني اعمل كده في البرمجة وفعلا قعدت اخش في جروبات كتير اوي
ومن ضمن الجروبات الي دخلتها كان جروب اسمه Elzero Web School عرفت بعد كده ان الجروب ده معمول اصلا لقناة بنفس الاسم
فدخلت علي القناة و لقيته شارح حاجات كتيرة جدا وتوهت جوة.
الغلطة اللي وقعت فيها للمرة التانية
فقولت ادور علي كورس لل HTML و CSS وبرده وانا في الجروب عرفت ان في لغة تانية المفروض اتعلمها وهي JavaScript (وطبعا انا مكنتش عارف هي لازمتها ايه اصلا).
فلقيت فعلا انه شارحهم فقولت انا كنت عارف ال html اصلا من الثلاث الفيديوهات بتوع زمان وال css اصلا بتاع تنسيق علشان يخلي الموقع شكلوا حلو فمش مهم دلوقتي فانا هخش علي طول علي ال JavaScript, وفعلا دخلت اتعلمه ومن اول فيديو ولقيتها صعبة جدا ومستحيلة ومش فاهم فيها اي حاجة واتعقدت منها وسيبت المجال تاني.
البداية الي بجد
في اول ثالثة اعدادي بقي لقيت ان القناة هتجدد كل الكورسات القديمة علشان الكورسات ده قعدت 7 سنين ولقيته هيبدأ بكورس html.
فقولت خلاص انا هبدأ معاه واتفرج علي الكورس كامل حتي لو كنت عارفه, ولما بدأت اكتشفت اني مكنتش عارف حاجة اصلا عن اللغة ده غير حاجات بسيطة اوي وخلصت الكورس وكنت مستمتع بيه اوي.
وبعد كده لقيته نزل ال css ودخلت برده واتفرجت عليه وادركت انها مش مجرد الوان وخلاص ده جزئ اساسي من اي موقع محترم وخلصت ودخلت بعد كده علي JavaScript ولقيتها سهلة وانا الي كنت شايفها صعبة علشان متعلمتش الحاجات الي قبلها وبعد كده عرفت بقي ان للبرمجة مجالات كتير وان المجال الي انا بتعلمه ده هو الويب وعرفت الرود ماب بتاعته الكاملة ومن هنا انا انطلقت.
فلازم تكون عارف ان اصعب حاجة هي البداية يعني من 0 ل 1 اصعب بكتير من 1 ل 10.
علشان كده لو انت لسة في البداية وحاسس انك تايه وان كل حاجة صعبة فاعرف ان ده طبيعي جدا وان كلنا مرينا بنفس الاحساس ده المهم انك متقفش.
يمكن محاولة واحدة صح هي الي تغير رحلتك, زي محصل معايا.
ايه هي الغلطات الي انا عملتها علشان متعملهاش
هاجي بقي اقولك شوية كلام كان نفسي حد يقولهوملي علشان كانت هتفرق معايا كتير وكنت هوفر سنين كنت ممكن اتعلم فيهم حاجات كتير
اول غلطة اني المفروض قبل مابدأ في اي حاجة اقرأ عنها الاول لان ده كان هيوفر عليا كتير اوي كنت هعرف ايه كل المجالات وكنت هعرف ايه اللغات الي المفروض اتعلمها وهكذا.
ثاني غلطة اني مدورتش بنفسي علي حل للمشاكل الي طلعتلي يعني لو كنت دورت علي جوجل لحل لموضوع اللينك ده وكنت عرفت اني المفروض ارفعه علي سيرفر كان زماني كملت بعد كده منغير مأقعد فترة طويلة كده.
ثالث غلطة اني مبدأتش من الاول يعني لو كنت خلصت كورس html كامل من اول مرة منغير مأقول اني عارفه كنت زماني برده كملت.
رابع غلطة اني حكمت علي حاجة انها مش مهمة منغير مأشوف بنفسي اذا كانت مهمة فعلا ولا لأ.